講起樓上咖啡室,在旺區當然係開到成行成市,小弟試過唔少不同類型之店,有些當然幾好食,有些未食完都立即埋單走人.當然今次寫的一間係小弟三年間都間唔中都走上去坐坐又食下野的,就是在通菜街(女人街)德發大廈之DREAM CAFE.
(有些圖片因攝於一年前,當時想寫但唔記得了,相片差了點請見諒)
店內有分中式茶座及西式雅座,但收費小弟就唔多覺有唔同.
點解小弟三年內間唔中都有來這是飲下野?除了食物質素在云云樓上cafe中為佳之外,又要講講小弟在網台講馬錄音的日子啦.............
可能大家都知道小弟係網上電台OPENRADIO<賽馬WQT>之監製及主持,第一集的<賽馬WQT>係在2006年8月頭播出的,當時因暑假並未講賽馬預測,只講講2006-2007馬季前瞻而已.雖然第一集係在我朋友的家中"踎"係度錄的(因當時朋友的家中只得幾張椅子,都用來放錄音設備.結果及後的一兩集,就和主持楊駿,魔術師及已冇做的好朋友馬如狼,就在這兒一路食一路錄音,故此個節目好多刀刀叉叉聲音.
講起CAFE,飲野當然唔少得.小弟較喜歡兩款飲品,就是凍的紅棗桂圓茶,特別在錄音口乾之時,此杯紅棗桂圓茶確有潤喉之感,而且佢沖得甜但唔係單單個種糖水甜味,而杯中都充滿了紅棗味道,此飲品確係此店之名作啦.女士應該會喜歡的.
另外小弟同樣喜歡的就是IRISH COFFEE,一飲便覺好足之BAILEYS味道在內.飲落亦做到唔太甜亦不完全掩蓋咖啡味,算係收貨了.
當然只講飲野一定唔夠,此店晚飯小弟最喜歡就是焗豬扒飯.當然餐湯如蕃茄湯及加要的蒜蓉包都唔錯,只少個湯夠熱唔搶味亦做得滑,而個蒜蓉包真係好熱辣辣,散出陣陣蒜蓉香氣
講到焗豬扒飯,一來真係好大份,如兩位情侶去食的話,如唔太大食的話兩位SHARE再叫一些小食都可.而個豬扒係經過炸透後才再去焗,芝士及汁醬亦唔過多又唔過厚,個扒又夠香,真係不俗.
看板娘---馬場樂子---對DREAM CAFE之評分:
講起店內其實唔太嘈雜,只係有些BACKGROUND MUSIC,係間唔中有些後生仔上來三五知己吹水傾計或玩下遊戲,雖然從店內看出去只係一些街景,但如情侶拍拖又咁啱行到女人街的話又算係歇歇腳的一個選擇.
最後影影店內的一張椅子,每次上到去此店,就不由自主地諗起小弟兩三年前和各主持錄音之情景,在此小弟想藉此懷緬一下因病離世接近一年之Openradio主持---細佬先生.雖然小弟同佢合作唔多,但唯一一次與他一起主持節目就是在這兒,當時大家係錄緊一個講女仔之節目,非常熱鬧開心.雖然他的聲音已不復返,但他主持節目時之認真及主動性現時的我仍然歷歷在目
是日河馬仔十場心水選擇:
第一場:
1.驍騎無敵-上次在嫌短狀態未全勇仲要起步慢之下,更可克服前領馬慢拖之下湧入一席第二足見此馬非池中物.今場換德叔更有信心,曾後勁可威脅連利精英之馬在五班之頭馬可說是囊中物
是場心水:
1.驍騎無敵-10.放縱-5.華忠寶-8.時時有機
第二場:
11.齊鼓掌-上仗失望之表現可以說是韋達的推騎不合此馬之情緒,眼見此馬在催策下有昂首拒絕之象,看來此馬並不適合困在內欄發揮,今次抽回外檔隻馬情緒又冇咁急,千祈唔好因韋達唔騎而忽視
是場心水:
11.齊鼓掌-6.時時攞彩-1.歡樂繽紛-4.成功網絡
第三場:
4.軍刀-講真跑番多多寶馬之水準,對住呢棚馬真係好明顯係一夫當關萬夫莫敵啦.仲要今場快馬唔少,而且同場對手狀態皆麻麻,應該今場用埋寶哥哥可開下糊
是場心水:
4.軍刀-5.印度光輝-9.飛躍之旅-14.電訊高星
第四場:
7.千江映月-此馬上場可在馬群中一搵到位後即時交出良好之走勢,當時狀態仲唔可以講得出太好,開波可迫近高手已可叫做唔差.今場主要對手經常要博出閘個下,此馬上次行圈幾安定而且計正路應有馬在前面COVER的話要贏應唔難
是場心水:
7.千江映月-10.駿蹄飛-2.富高勝-11.雄心馬主
|